Hvað er World Jamboree

Hugtakið á ensku “World Jamboree” höfum við þýtt á íslensku sem Alheimsmót skáta.  Orðið Jamboree er úr indijánamáli og þýðir „fjöldi stríðsmanna frá mörgum ættflokkum samankomnir til friðsamlegrar keppni” (Skátahandbókin, bls. 284).  Robert Baden Powell, stofnandi skátahreyfingarinnar, tók þetta orð upp til að lýsa stóru skátamóti þar sem skátar hittast við leik og störf.

Með tímanum hefur  World Jamboree breyst í stórviðburð þar sem 30-40 þúsund skátar frá yfir 150 löndum hittast á fjögurra ára fresti.  Flestir eignast þar lífstíðarvini frá mismunandi stöðum í heiminum.  Á  World Jamboree muntu upplifa að skátaandinn nær yfir fjölmörg lönd þrátt fyrir mismunandi menningarheima, trúarbrögð og jafnvel styrjaldir. Á  World Jamboree eru allir vinir.

Hvað gerist á  World Jamboree?

Heimsmótið verður haldið dagana 27. júlí til 8. ágúst 2007 rétt norðaustur af London í Englandi.  Þema mótsins er: “One World One Promise” eða Einn heimur, eitt heiti.  Dagskrá mótsins er fjölbreytt og spennandi. Stór hluti af mótinu er auðvitað að búa í tjaldbúð í samfélagi við 40 þúsund aðra skáta alls staðar úr heiminum.  Þar hittast vinir við varðeld á kvöldin, margvíslegar uppákomur verða um allt svæðið, skipta á merkjum frá öllum heimshornum, skoða höfuðstöðvar annarra þátttökulanda og safna stimplum í mótsbókina, og margt fleira spennandi.  Hápunktur mótsins verður án efa þegar skátar fagna 100 ára afmæli skátastarfs í heiminum.  Að búa með fólki alls staðar að úr heiminum í þéttri tjaldbúð þar sem friður, samvinna og skemmtun ræður ríkjum er einstök upplifun sem þú ættir ekki að missa af og vertu viss að þú munt eiga erfitt með að rifja upp síðar á æfinni allar sólarlandaferðirnar og önnur ferðalög, en þessi ferð mun örugglega standa upp úr – þannig hefur það verið meðal allra sem á Alheimsmót skáta hafa farið í áranna rás.

Að taka þátt í almennum skátabúðum.

Ef þú ert fædd/ur á árunum 1989 til 1993 gefst þér tækifæri til að taka þátt í almennum skátabúðum. Í því fellst að þú færð að taka þátt í allri dagskrá mótsins sem þátttakandi. Heimsmót skáta eru haldin á fjögurra ára fresti og því færð þú aðeins þetta eina tækifæri til að fara á heimsmót sem almennur þátttakandi.Þátttakendum verður skipt í 36 manna sveitir með níu skátum í hverjum flokki. Með hverri sveit fara svo 4 fullorðnir sveitarforingjar.

Að taka þátt sem sveitarforingi eða starfsmaður mótsins.

Ef þú ert á aldrinum 18 ára eða eldri átt þú kost á að sækja um sem sveitarforingi eða í starfsmannabúðum mótsins.  Fjórir sveitarforingjar fylgja hverri sveit jafnt í undirbúningi mótsins, á leiðinni út og heim, sem og allan tímann á mótinu sjálfu.Á mótinu verða alþjóðlegar vinnubúðir sem er  mjög spennandi kostur fyrir skáta á þessum aldri.  Skátar í starfsmannabúðum hjálpa til við dagskrá, matarúthlutun, öryggisgæslu, stórviðburði, tjaldbúðarlíf og margt fleira.Að taka þátt sem starfsmaður fararstjórnar eða aðstoðarfarastjóriEf þú ert eldri en 20 ára getur þú  sótt um sem aðstoðarfararstjóri eða starfsmaður fararstjórnar.  Í svona langferð með skátahóp eru ýmis verk sem þarf að sinna í undirbúningi og kynningu mótsins.  Einnig þarf fólk til að vera á höfuðstöðvum okkar á mótinu og kynna skátastarf á Íslandi sem og að taka á málum sem kunna að koma upp.  

Hvað er svona frábært við Bretland?

Bretland er íslendingum að mörgu leiti vel kunnugt en á alheimsmóti gefst tækifæri til að kynnast landinu á alveg nýjan hátt.  Bretland er fjölmenningarlegt samfélag með um 60 milljón íbúum, sem eru heimsfrægir fyrir ýmislegt allt frá tónlist (Bítlarnir) til uppgötvana á mörgum sviðum s.s. sjónvarpið, þingræði – og skátastarf.  Baden Powell byrjaði einmitt skátastarfið í Bretlandi 1907.  Bretland er aðili að Evrópubandalaginu og samanstendur af fjórum löndum – Englandi, Wales, Skotlandi og Norður Írlandi.  Enskan er móðurmál Breta.  Veðurfar í Bretlandi er milt og þægilegt og þar ríkir vinstri umferð.  Mótinu hefur verið valinn staður í Hylands Park, Chelmsford í Essex sem er um 50 km norðaustur af London.  Hylands park er 400 hektara landsvæði, þar er almenningagarður, skóglendi og víðir akrar.  Verið er að byggja svæðið upp þannig að það geti þjónað Alheimsmótinu með öllum þeim búnaði og aðstöðu sem 40 þúsund manna samfélag þarfnast til að geta virkað meðan á mótinu stendur.

Ferðaáætlun (drög)

27. júlí 2007            Farið frá Íslandi (upphaf ferðar er á Keflavíkurflugvelli).

28. júlí 2007            Mótssetning

7.   ágúst 2007        Mótsslit

8.   ágúst 2007        Farið frá mótsstað í heimagistingu í Bretlandi

12. ágúst 2007        Flogið heim til Íslands (ferð lýkur á Keflavíkurflugvelli).

Fararstjórar

Stjórn Bís hefur skipað margreynda skáta til að stýra undirbúningi og ferð íslenskra skáta á Alheimsmótið 2007.  Þeir eru:

Bragi Björnsson, (1968) lögmaður og aðstoðarskátahöfðingi, aðalfararstjóri, skátafélaginu Ægisbúar (var aðalfararstjóri á Alheimsmótið í Chile 1999).

Hulda Sólrún Guðmundsdóttir, (1968) sálfræðingur, mótsstjóri Landsmóts skáta 2005 og formaður Alþjóðaráðs, skátafélaginu Garðbúar (var í fararstjórn á Alheimsmótin í Kóreu 1991 og í Hollandi 1995).

Sonja Kjartansdóttir, (1964) starfsmaður KB líftrygginga hf og fyrrv. formaður Starfsráðs BÍS, skátafélaginu Segli (var í fararstjórn á Alheimsmótið í Hollandi 1995).

Þorsteinn Fr. Sigurðsson (1952) rekstarhagfræðingur og framkvæmdastjóri BÍS, fjármálastjóri ferðarinnar, skátafélaginu Garðbúar (var aðalfararstjóri á Alheimsmótið í Hollandi 1995).